Grupi hetimor i ngritur për zbardhjen e shkaqeve të zjarrit që shkrumboi lokalin e Noizyt në Durrës nuk ka dalë ende me një version përfundimtar. Dyshimet paraprake janë në dy pista, e para zjarri është aksidental i shkaktuar nga një shkëndijë elektrike si pasojë e mbingarkimit të rrjetit dhe pista e dytë e zjarrvënies së qëllimshme. Për këtë arsye, grupi hetimor ka sekuestruar pamjet e kamerave të sigurisë. Ajo që ngre dyshimet mbi zjarrvënien e qëllimshme është fakti se deri më tani grupi ka identifikuar tre vatra nga ku ka nisur zjarri. Ekzistenca e këtyre tre vatrave, që besohet se kanë shpërthyer njëkohësisht në distancë relativisht të largët nga njëra-tjetra minimizon bindjen se zjarri ka qenë aksidental, pasi është thuajse e pamundur që shkëndijat elektrike të shpërthejnë në tre zona të ndryshme, për më tepër në të njëjtën kohë. Pikërisht këto prova përforcojnë dyshimet se zjarri ka qenë i qëllimshëm dhe po hetohet edhe më tej në këtë pistë.