Kryeministri i Kosovës, Albin Kurti është takuar në Nju Jork me Presidentin turk, Rexhep Taip Erdoan. Përmes një postimi në rrjetet sociale, Kurti thotë se falenderoi Erdogan për mbështetjen e dhënë ndaj shtetit të Kosovës në ekonomi, diplomacy dhe siguri. “Kosova me Turqinë kanë vazhduar forcimin dhe rritjen tregtare që arrijnë vlerën prej 1 miliard dollarësh me synimin që të rriten më shumë në të ardhmen. Po ashtu, janë rritur edhe investimet në Kosovë ku së fundmi kemi nisjen e fabrikës së re të municionit në Gjakovë dhe Parkun e Energjisë së Erës në Rahovec që janë në bashkëpunim me kompani nga Turqia”, shkruan Kurti. Ai deklaron se me Erdogan ka biseduar edhe për vendimin e padrejtë të Hagës ndaj ish krerëve të UÇK, ku sipas kryeministrit të Kosovës, ky vendim duhet të korrigjohet në Apel. “Kosova dhe Turqia do të vazhdojnë të thellojnë marrëdhëniet miqësore, sikurse do të rrisin e forcojnë edhe relacionet ekonomike e tregtare. Në fund, me kënaqësi i bëra ftesë Presidentit Erdogan për vizitë në Republikën e Kosovës”, mbyll mesazhin e tij kreu i Qeverisë së Kosovës.