Kryeministri i Kosovës, Albin Kurti, tha se vendimi i marrë të enjten vonë për heqjen e regjimit të letrës ngjitëse për automjetet me targa serbe ka ardhur pasi Policia e Kosovës raportoi se vendimi i Serbisë për të lejuar targat RKS të lëvizin lirshëm në territorin e këtij shteti, po zbatohet plotësisht. Përmes një shkrimi në Facebook, Kurti tha se nëse do të ketë ndryshim të qëndrimit nga autoritetet serbe, shteti i Kosovës do të veprojë. Serbia vendosi t'i lejojë automjetet me targa RKS të lëvizin lirshëm në territorin e saj nga fillimi i kësaj jave. “Nga raporti i policisë sonë e cila ka monitoruar gjithçka me shumë vëmendje jemi njoftuar që kemi zbatim të plotë, dhe se nuk ka pasur incidente a pengesa. Ndaj, bazuar në parimin e reciprocitetit si një premisë e rregullimit të marrëdhënieve të shteteve të pavarura, mbrëmë morëm vendim që të lejohen edhe automjetet që vijnë nga ana tjetër e kufirit me targa të Serbisë”, tha Kurti duke theksuar se ky vendim nis të zbatohet pas publikimit në Gazetën Zyrtare. “Në rast se Policia e Kosovës ndërkohë merr raportime nga terreni për ndryshim të qëndrimit nga autoritetet e Serbisë për lejimin e lëvizjes së lirë të automjeteve me targa të Republikës së Kosovës në territorin e Serbisë, apo pengimin e lëvizjes së lirë në çfarëdo forme, ne do të veprojmë”, ka shtuar Kurti.