Kryeministri i Kosovës, Albin Kurti, ka pranuar se ka përplasje dhe marrëdhënie të vështira me të dërguarin amerikan për Ballkanin Perëndimor, Gabriel Escobar, dhe atë evropian për dialogun Kosovë-Serbi, Mirosllav Lajçak, por shtoi se është i bindur se këto pengesa do të tejkalohen. Ecobar, ka treguar se do ti raportojë Shtëpisë së Bardhë gjatë të premtes së kësaj jave, rreth qëndrimit që do të marrë Qeveria e Kosovës në raport me kërkesat ndërkombëtare për de-përshkallëzim në Veri. Kjo u interpretua edhe si një afat për kryeministrin lidhur me kërkesat e paraqitura edhe nga Brukseli zyrtar, por Kurti thotë se nuk ka marrë asnjë ultimatum pas takimit me emisarët e SHBA-së dhe të BE-së dhe ka potencuar se u ka ofruar atyre mënyrën për të dalë nga kriza. kur u pyet nga gazetarët për deklaratën e Escobarit që tha se nëse Prishtina dëshiron të ecë drejt integrimit evropian, ajo duhet ta formojë Asociacionin e komunave me shumicë serbe në Kosovë, Kurti tha se këto cështje nuk zgjidhen me presion.