Kryeministri në detyrë i Kosovës, Albin Kurti, i është përgjigjur deklaratës së presidentit ukrainas Volodymyr Zelensky, i cili gjatë vizitës së tij në Beograd përsëriti se Ukraina nuk ka ndryshuar qëndrimin për mosnjohjen e pavarësisë së Kosovës. Gjatë ceremonisë për 35-vjetorin e pavarësisë së Ukrainës, Kurti deklaroi se Prishtina beson se qëndrimi i Kievit nuk përputhet me faktet historike dhe të drejtën ndërkombëtare. “Ne besojmë se ai qëndrim nuk qëndron as para fakteve historike, as para të drejtës ndërkombëtare dhe do ta themi këtë sa herë të jetë nevoja”, u shpreh Kurti, duke shtuar se Kosova mirëpret njohjen nga Ukraina dhe nga çdo shtet tjetër që ende nuk e ka njohur pavarësinë e saj. Megjithatë, Kurti theksoi se mbështetja e Kosovës për Ukrainën nuk është e kushtëzuar nga çështja e njohjes.