Albin Kurti nuk ka kthyer një përgjigje të prerë, nëse do të mbahen zgjedhje të reja në katër komunat veriore apo jo, pas thirrjes dhe presionit të Bashkimit Europian. Ai ka reaguar pas kërkesës së përsëritur të Brukselit, duke thënë se sundimi i ligjit është i barabartë për të gjithë dhe se nuk mund të ketë asnjë pakicë të privilegjuar. Në një deklaratë për mediat, Kurti tha se komunat në Veri janë asete të Kosovës dhe se nuk mund të ketë kryetarë të rinj pa zgjedhje të reja. Ai tha se është i vetëdijshëm që legjitimiteti i kryetarëve shqiptarë të katër komunave është i vakët, për shkak të pjesëmarrjes së ulët në zgjedhje. Por tha gjithashtu se zyrat dhe ndërtesat në Leposaviç, Zveçan e Zubin Potok janë asete të Kosovës, që nuk mund të merren peng. Sipas Kurtit gjithçka është duke shkuar drejt normalizimit, ndërsa ka shtuar se për t’u arritur sa më shpejt normalizimi, presioni nuk duhet ushtruar në Prishtinë, por në Beograd.