Kryetari i LDK-së, Lumir Abdixhiku, dhe kryetari i LVV-së, Albin Kurti, kanë zhvilluar takimin e radhës në kuadër të përpjekjeve për arritjen e një marrëveshjeje politike për konstituimin e institucioneve të reja të Kosovës. Pas takimit, Abdixhiku deklaroi se nuk ka pasur ndonjë rezultat të ri dhe se palët vijojnë të jenë larg një marrëveshjeje. Kreu i LDK-së bëri të qartë se partia e tij kërkon të jetë pjesë e bashkëqeverisjes, duke kundërshtuar ofertën e mëparshme që, sipas tij, parashikonte vetëm postin e zëvendëskryeministrit dhe disa ministri. Sipas tij, në kushtet aktuale, kryeministri i takon partisë së parë, ndërsa edhe posti i kryetarit të Kuvendit, sipas tij, i takon partisë së parë në bazë të Kushtetutës. Nga ana tjetër, kryeministri në detyrë, Albin Kurti, tha se takimi nuk prodhoi një marrëveshje konkrete, por nënvizoi se zgjidhja për krizën institucionale lidhet me dakordësimin për presidentin e ri. Ai shtoi se edhe nëse arrihet marrëveshje për zgjedhjen e kryetarit dhe kryesisë së Kuvendit dhe formimin e Qeverisë së re, pa një dakordim për presidentin vendi do të rikthehej te e njëjta problematikë. Pavarësisht takimit, palët duket se vijojnë të kenë dallime të rëndësishme, veçanërisht sa i përket përfaqësimit të LDK-së në qeveri dhe mënyrës së zgjedhjes së presidentit, duke rrezikuar që Kosova të shkojë sërish drejt kutive të votimit.