Kryeministri në detyrë, Albin Kurti, u ka dërguar ftesa të reja për takim kryetarëve të partive politike, në një kohë kur situata politike në Kosovë vijon të jetë e tensionuar. Ftesat u janë dërguar kryetarit të PDK-së, Bedri Hamza, kryetarit të LDK-së, Lumir Abdixhiku, si dhe kryetarit të Aleancës, Ardian Gjini. Megjithatë, sipas mediave vendase, Kurti nuk ka përcaktuar një datë konkrete për takimin, duke ua lënë kryetarëve të partive që të përcaktojnë momentin kur janë të gatshëm të zhvillojnë bisedimet. Ftesa vjen në një situatë të tensionuar politike, pasi partitë opozitare, veçanërisht PDK-ja dhe Aleanca, kanë kërkuar që të thirret seanca për konstituimin e Kuvendit të Kosovës. Sipas tyre, afatet kushtetuese për konstituimin e institucioneve janë tejkaluar. Opozita ka akuzuar Lëvizjen Vetëvendosje dhe Albin Kurtin për bllokim të institucioneve dhe shkelje të Kushtetutës, ndërsa kërkesa kryesore e tyre vijon të jetë funksionalizimi i Kuvendit dhe krijimi i institucioneve të reja.