Albin Kurti është i bindur në fitoren e Vetëvendosjes në zgjedhjet e 9 shkurtit, ai madje thotë se rezultati do të jetë edhe më bindës se sa ai i katër viteve më parë. Kurti - “Ne presim ta tejkalojmë rezultatin e vitit 2021 për shkak se para katër vitesh i kishim 438 mijë vota dhe besoj që është reale që të presim që të kemi rritje, prandaj e kemi vendosur këtë synim prej gjysmë milioni vota në zgjedhjet e 9 shkurtit 2025. Jemi shumë të lumtur që kemi pasur stabilitet institucional, jemi qeveria e parë që e çon mandatin deri në fund dhe uroj që ky të jetë një fillim i mbarë i stabilitetit institucional në Republikën e Kosovës, për dallim prej qeverive të mëhershme në Kosovën e pavarur që nuk e përfundonin mandatin. Kemi nevojë për qeveri të cilat për zotimet e tyre i kanë katër vjet mandat të plotë”. Në një intervistë për Kosovapress, Kryeministri i Kosovës shton se në përfundim të procesit nuk do të ketë nevojë për koalicione për të formuar qeverinë e re dhe akuzon opozitën se nuk është reformuar.