Kryeministri në detyrë, njëherazi kryetari i Lëvizjes Vetëvendosje, Albin Kurti u ka dërguar ftesë partive të tjera politike në Kosovë për t’u takuar dhe për të diskutuar krijimin e institucioneve të reja. Ftesat vijnë pak ditë para seancës konstituive të Kuvendit të Kosovës, e caktuar të mbahet më 6 gusht. Detajet i dha ushtruesja e detyrës së presidentes, Albulena Haxhiu, në një prononcim për KosovaPress. “Së pari siç e dini, tashmë ftesat drejtuar partive politike për takime të radhës janë adresuar te të njëjtat. Pra kryeministri Kurti në vazhdimësi ka bërë përpjekje që të ketë takime në raport me arritjen e një marrëveshje për çështjen e presidentit. Unë kam mirëpritur këto takime dhe mendoj që e vetmja mundësi për të mbërritur deri te një marrëveshje janë takimet të cilat ndodhin ndërmjet partive politike. Tani ju e dini që seanca konstituive siç e përmendët është caktuar me datë 6 gusht, edhe presim që para 6 gushtit të ketë takime ndërmjet partive politike dhe në anën tjetër të ketë përpjekje maksimale për ta pasur një marrëveshje që ndërlidhet me çështjen e presidentit. Lëvizja Vetëvendosje siç e keni parë i ka adresuar përgjegjësitë që ka përmes kryetarit dhe kryeministrit Kurti, por presim që edhe partitë e tjera politike të reflektojnë në raport me përgjegjësitë që i kanë” Haxhiu shtoi se është e rëndësishme që të ketë unifikim mes partive politike në kuvend për hir të përgjegjësive që ligjvënësit kanë para qytetarëve.