Muaji nëntor në Shqipëri ka shënuar shifra të larta të të infektuarve dhe viktimave nga koronavirusi. Autoritetet shëndetësore thonë se ka edhe 20 për qind të kapaciteteve spitalore, të gatshme për të pritur pacientë që kërkojnë kurim në spital. Por, ka edhe shumë shqiptarë me mundësi ekonomike që kanë zgjedhur të kurohen jashtë vendit. Shumë prej tyre edhe personazhe publike, një prej të cilëve deputeti Enver Roshi. Gjithsesi, për shëndetin shumë njerëz edhe ato pak kursime i kanë shpenzuar për kurimin në Turqi. Autoriteti i Aviacionit Civil, sic shkruan BIRN thotë se deri më 18 nëntor kishte pasur 565 fluturime për qëllime mjekësore” nga Rinasi, shumica dërrmuese e të cilave në muajt tetor dhe nëntor. Të dhënat e Autoritetit të Aviacionit Civil tregojnë se numri i fluturimeve u rrit nga 5 në muajin maj, kur epidemia COVID-19 ishte ende nën kontroll, në 152 fluturime gjatë muajit tetor. Muaji nëntor shënoi një rekord të ri me 206 fluturime për qëllime mjekësore deri me datë 18. Nga të dhënat e mbledhura nga dy kompani që ofronin shërbimin e avionit ambulancë, pacientët shqiptarë kanë shpenzuar rreth 6.7 milionë euro vetëm për fluturimet jashtë shtetit. Shpenzimet minimale për ditët e qëndrimit të tyre në spitalet e Turqisë llogariten të kenë kushtuar edhe rreth 12 milionë euro të tjera.