Publikimi i listave me pagat e më shumë se 600 mijë shqiptarëve po bën xhiron e rrjetit prej dy ditësh, ndërsa kjo ngjarje tronditi opinionin publik. Ky ishte skandali i dytë pas pothuajse 9 muajsh në Shqipëri, pas asaj të patronazhistëve, ku në periudhë zgjedhjesh u publikuan preferencat politike dhe identitetet e shumë shqiptarëve. Skandali i cili po përplitet gjerësisht që prej mbrëmjes së të martës, ka vënë në lëvizje prokurorinë e Tiranës për të zbuluar se kush fshihet pas publikimit të të dhënave personale të më shumë se 600 mijë shqiptarëve dhe të huajve që janë punëmarrës në vendin tonë. Mirëpo, ajo cka ra më shumë në sy në këto lista ishin emrat e disa biznesmenëve të njohur, apo shumë zyrtarëve të tjerë me shuma marramendëse të pagesave mujore. Nga ana tjetër, nga disa kërkime rezulton se në Ontario të Kanadasë, cdo punonjës, i cili e ka pagën mujore më shumë se 100 mijë dollarë e deklaron atë në një listë e cila quhet “Sunshine List”, e cila publikohet cdo pranverë. Mirëpo cfarë është kjo listë?! Sunshine list është një listë ku jepen informacione të detajuara në lidhje me pagat e të punësuarve. Në Kanada, kjo listë përdoret nga qeveritë provinciale ose komunale për të identifikuar çdo person të punësuar publikisht që ka pagë 100 000 dollarë ose më shumë. Qëllimi i listës është të sigurojë llogaridhënie dhe transparencë, duke kërkuar që "organizatat që marrin fonde publike nga Provinca e Ontarios të zbulojnë çdo vit emrat, pozicionet, pagat dhe përfitimet totale të tatueshme të punonjësve të paguar 100 mijë dollarë ose më shumë në një vit kalendarik.