Në vitin 2007, në atë kohë 20 vjeç, Lionel Messi kishte pak kohë që kishte nisur rrugëtimin e shndërrimit të një prej futbollistëve më të mëdhenj në historinë e këtij sporti. Sapo kishte fituar trofetë e parë me Barcelonën, duke magjepsur tifozët e sportit më popullor në botë me spektaklin që ofronte në fushë. Emri i argjentinasit përflitej gjithandej dhe për të shfrytëzuar famën në rritje të tij, Barcelona vendos që ta aktivizojë në fushata bamirësie. Në një prej tyre, Messit iu kërkua që të merrte pjesë në një set fotografik, ku mes të tjera shkrep disa imazhe me një foshnje që kishte pesë muajsh. Autori i fotografisë, Joan Monfort as që e imagjinonte në atë kohë se foshnja që Messi mbante në krah dhe lante në vaskë do të shndërrohej më pak se 17 vite më vonë në një emër po aq të përfolur sa argjentinasi në botën e futbollit. Bëhet fjalë për Lamine Yamal, që në moshën 16 vjeç e 362 ditë u shndërrua në lojtarin më të ri që shënon në një kampionat europian dhe për më tepër e bëri këtë duke shënuar një supergol, në një ndeshje gjysmëfinale dhe me Francën përballë. Fotoja e harruar në arkivat e fotografit të Associated Press u rikthye në vëmendje javën e kaluar, kur babai i Lamine Yamal, e postoi javën e kaluar me tekstin: “Nisja e dy legjendave”.