Më 5 janar 1993, pak ditë para se Bill Clinton të inaugurohej si president i Shteteve të Bashkuara, Sekretari amerikan i Shtetit, në largim, Lorence Eagleburger, hartoi një dokument 23-faqësh për pasardhësin e tij. Dy ditë më herët, shefi i Eagleburger-it, ish-presidenti George Bush i vjetri, kishte udhëtuar në Moskë për të firmosur me ish-presidentin rus, Boris Yeltsin një traktat të ri për kontrollin e armëve, START II. Kjo marrëveshje është konsideruar fitore e minutës së fundit në mandatin e tij, gjatë të cilit iu dha fund tensioneve bërthamore të Luftës së Ftohtë, prandaj shumë njerëz menduan se po niste një epokë e re në marrëdhëniet mes Moskës dhe Uashingtonit. Dokumenti që iu la në tavolinë Uarren Christopher-it ishte një përmbledhje e tensioneve dhe konflikteve nëpër botë, dhe jo më pak të rëndësishme ishin mbetjet e ish-Bashkimit Sovjetik, që atëherë kishte vetëm 13 muaj që kishte pushuar së ekzistuari. Në listë ishin përfshirë rreziqet nga lufta në ish-Jugosllavi, “prishja e reformave në Rusi dhe kthimi në një formë të pushtetit autoritar”. Eagleburger po ashtu paralajmëronte pasardhësin për rreziqet e një konflikti të armatosur mes “Rusisë dhe një numri shtetesh në periferinë e saj”.