Kreu i grupit mercenar rus, Ëagner, Yevgeny Prigozhin ka paralajmëruar se një kundërsulm ukrainas, për të cilin ka javë që flitet, mund të kthehet në një tragjedi për Rusinë ndërkohë që mercenarët që ai drejton nuk kanë municione. Për muaj të tërë Ëagner ka udhëhequr sulmin rus në Bakhmut, qytetin lindor të Ukrainës. Vetë Prigozhin njihet si një aleat i presidentit Vladimir Putin, ndërkohë që si kreu i një formacioni paraushtarak ka qenë i përfshirë në një luftë për pushtet me ministrinë ruse të mbrojtjes ndaj të cilës nuk i ka kursyer kritikat edhe në kohë lufte. “Ne kemi vetëm 10-15 për qind të municioneve që na nevojiten”, tha ai, duke fajësuar lidershipin e ushtrisë së Rusisë. Prigozhin tha se pret që kundërsulmi i ukrainasve të fillojë në mes të muajit maj, dhe sipas tij “kjo kundërofensivë mund të kthehet në një tragjedi për Rusinë”. Prigozhin paralajmëroi madje edhe se grupi Vagner mund të tërhiqet shpejt nga fronti, nëse Kremlini nuk do të bëjë dicka për të ndryshuar situatën. Vagner, raportohet se cdo ditë dërgon shumë arkivolë me trupa të pajetë të pjesëtarëve të tij, në Rusi, pavarësisht se nuk ka shifra të sakta të humbjeve. Vetë Prigozhin është shfaqur disa herë, në video të postuara në rrjetet sociale, përpara arkivolëve të ushtarëve të rënë në luftë dhe kërkesat për furnizime me municion, drejtuar Moskës, janë përsëritur shpesh.