55 punonjës të Kadastrës së Vlorës kanë nënshkruar një peticion ku kundërshtojnë vendimin e Agjencisë Shtetërore të Kadastrës për transferimin e zyrave të kësaj dege në Tiranë. Punonjësit thonë se vendimi rrit kostot jo vetëm për ta, por edhe për qytetarët, që duhet të udhëtojnë drejt kryeqytetit për të përfituar shërbimet e Kadastrës. Vendimi është kundërshtuar edhe nga deputetja demokrate e qarkut, Ina Zhupa, që përveç kostove thotë se ai është i paligjshëm. Zhupa thekson se ky akt synon centralizimin abuziv të shërbimeve publike, cenon parimet e dekoncentrimit dhe decentralizimit, dëmton aksesin e qytetarëve në informacion dhe detyron punonjësit të heqin dorë nga marrëdhëniet e punës, ndërsa kërkon shfuqizimin e menjëhershëm të vendimit dhe vendosjen e përgjegjësisë ligjore për autorët e tij. “Ky akt përbën një precedent të rrezikshëm dhe një goditje të drejtpërdrejtë ndaj qytetarëve të Vlorës. Ai duhet të shfuqizohet menjëherë, ndërsa firmëtarët duhet të mbajnë përgjegjësi ligjore dhe administrative për këtë vendim të paligjshëm dhe të dëmshëm”, shkruan Zhupa në rrjetet sociale.