Politikani opozitar rus, Aleksei Navalny, ka vdekur në burg, u tha në një deklaratë të lëshuar nga një departament lokal i Shërbimit Federal të Burgjeve. Në deklaratën e Shërbimit Federal të Burgjeve u tha se Navalny u ndje keq, pas ecjes të premten dhe më pas humbi vetëdijen. Një autoambulancë shkoi në tentativë për ta trajtuar atë, por ai vdiq, u tha në deklaratë. “Të gjitha masat për ta kthyer në jetë u ndërmorën, por ato nuk prodhuan rezultate pozitive. Mjekët e autoambulancës e shpallën të vdekur të burgosurin. Shkaku i vdekjes është duke u përcaktuar”, u tha në deklaratën e Shërbimit rus, njoftim që nuk ka qenë e mundur të konfirmohet në mënyrë të pavarur. Mediat e kontrolluara nga shteti rus po ashtu kanë cituar këtë deklaratë, duke raportuar se Navalny, 47 vjeç, ka vdekur. Zëdhënësi i Kremlinit, Dmitry Peskov tha ndërkohë se presidenti rus, Vladimir Putin, është informuar për raportimet lidhur me vdekjen e Navalnyt dhe se ai nuk kishte informacione për shkakun e vdekjes së tij. Ndërkaq, sekretarja për media e Navalnyt, Kira Yarmysh, shkroi në platformën X, se ekipi i kritikut të Kremlinit, nuk ka konfirmim për vdekjen e tij. "Shërbimi Federal i Burgjeve në qarkun Jamalo-Nenets po shpërndan lajme për vdekjen e Aleksei Navalnyt në burgun IK-3. Ne ende nuk kemi konfirmim për këtë lajm. Avokati i Navalnyt do të shkojë atje dhe sapo të kemi informacione, do t'iu njoftojmë", shkroi ajo. Dy ditë më parë, autoritetet kishin njoftuar se Navalny ishte dërguar në izolim për të 27-herë që kur ishte burgosur tri vjet më parë. Navalny, i cili i shpëtoi vdekjes pasi u helmua me agjentin novicok, në 2020-ën, u ndalua më 17 janar 2021, në aeroportin e Moskës, pasi u kthye nga gjermania, ku edhe u trajtua nga mjekët. Ai u dënua me dy vite e gjysmë burg për shkeljen e kushteve të lirimit, pasi ishte larguar nga vendi për trajtim mjekësor. Kremlini ka mohuar se ka pasur gisht në helmimin e Navalnyt. Në mars 2022, Navalny u dënua me nëntë vjet burgim për përvetësim dhe mashtrim. Në gusht të vitit të kaluar, një gjykatë e dënoi Navalnyn me 19 vjet burg nën akuza për ekstremizëm. Kohët e fundit, Navalny ishte dërguar të vuante dënimin në burgun famëkeq, IK-3 në Siberi, i njohur edhe si “Ujku polar”.