Është ekstraduar nga Spanja një 26 vjeçar i akuzuar për kultivim droge. Algert Zeneli, banues në Milot, akuzohet se në vitin 2023, kultivoi në territorin e Shkodrës rreth 11 mijë bimë narkotike. 26-vjeçari ishte shpallur në kërkim ndërkombëtar, pasi Gjykata e Shkallës së Parë të Juridiksionit të Përgjithshëm Shkodër i ka caktuar masën e sigurisë “Arrest në burg”, për veprat penale “Kultivimi i bimëve narkotike”, “Prodhimi dhe shitja e narkotikëve”, “Grupi i strukturuar kriminal” dhe “Kryerja e veprave penale nga organizata kriminale ose grupi i strukturuar kriminal”. Nga hetimet dyshohet se gjatë vitit 2023, në fshatin Kir, si dhe në disa zona të tjera në afërsi të fshatit Theth, në territorin e Shkodrës, ky shtetas, në bashkëpunim me anëtarë të tjerë të një grupi të strukturuar kriminal, ka kultivuar 10 900 bimë të dyshuara narkotike, të llojit Cannabis Sativa. Nga shkëmbimi i informacionit dhe koordinimit operacional ndërmjet Interpol Tirana dhe Interpol Madrid, ai u arrestuar për tu ekstraduar drejt Shqipërisë.