Drejtori i Përgjithshëm i Policisë së Shtetit, Skënder Hita zhvilloi takime me strukturat e Drejtorisë së Policisë Kukës dhe Dibër, si edhe me ato kufitare. Këto takime kishin në fokus sezonin turistik, sigurinë në shkolla, sigurinë rrugore, parandalimi i zjarrvënieve, shërbimi cilësor për qytetarët, si dhe goditja e çdo paligjshmërie. Gjatë takimeve, kryepolici Hita kërkoi nga strukturat policore angazhim maksimal, vëmendje të veçantë për sigurinë në shkolla deri në përfundim të vitit shkollor, si dhe shërbime të hapura dhe me agjentë të Policisë Kriminale për të goditur elementet kriminale që tentojnë t’iu afrohen shkollave. Po ashtu u kërkua monitorim me mjete inteligjente të qarkullimit rrugor në të akset nacionale. Përsa iu përket qendrave urbane, Hita shtoi kërkesat jo vetëm ndaj Policisë Rrugore, por edhe ndaj patrullave dhe Forcave “Shqiponja”. Siguria e turistëve ishte një tjetër porosi e Drejtorit të Përgjithshëm, duke lënë detyra për strukturat e Policisë. Edhe ndaj Policisë Kufitare Hita kërkoi shërbim më cilësor dhe shtim sportelesh në raste fluksi.