Zakonisht, në muajt e verës, të gjithë duan të shijojnë shëtitjet në park, plazhin, notin, banjat e diellit e sportet. Por temperaturat dhe rrezet e diellit bëhen të rrezikshme. Dielli i fortë në kokë dhe në zonën e qafës mund të shkaktojë insolacion ose heliosis. Lëkura dhe indet e trurit ngacmohen nga nxehtësia e madhe dhe mund të shkaktojnë të ashtuquajturin meningjit aseptik, një infeksion truri që nuk shkaktohet nga ndonjë bakterie. Kjo goditje nga dielli është goditje e izoluar në kokë nga i nxehti. Personit që goditet nga dielli ndjen t’i digjet koka, skuqet në fytyrë, ka dhimbje qafe, që mund të shoqërohen me lodhje, trazira dhe të vjella. Shpesh ka edhe marrje mendsh. Ndërsa temperatura e trupit, tek një person i goditur nga dielli, nuk është e lartë por e ulët. Ekspertët këshillojnë qëndrimin në ambjente të freskëta, pirjen e shumë lëngjeve dhe evitimin e daljes në diell. Edhe nga djersitja e madhe, thonë ata, mund të shkaktohen humbje të shtuara të lëngjeve të trupit që në ditë të nxehta mund të arrijnë deri në dy litra në ditë. Ndaj, duhet të tregojmë shumë kujdes. Sidoqoftë, tërheqin vëmendjen ekspertët, hipertermia është më e rrezikshme se insolacioni. Ajo shkaktohet kryesisht nga mbilodhja fizike në një ambjent të nxehtë. Për shkak të temperaturave të larta, trupi merr më shumë nxehtësi nga sa mund të nxjerrë dhe temperatura e tij mund të arrijë deri në 41 gradë celcius brenda disa minutave. Vecanërisht të rrezikuar janë fëmijët dhe të moshuarit.