Një person i armatosur vrau nëntë persona dhe plagosi dhjetëra të tjerë në një shkollë në Kanadanëë perëndimore të martën, përpara se t’i merrte jetën vetes. Vrasjet ndodhën në Tumbler Ridge, në British Columbia, një qytet piktoresk malor. Një total prej 27 personash u plagosën, përfshirë dy me lëndime serioze dhe 25 që pësuan lëndime jo kërcënuese për jetën, tha Policia Kanadeze në një deklaratë. Media kanadeze ka raportuar se autorja e sulmit ishte një femër, ‘e veshur me fustan’, por zyrtarët nuk dhanë detaje mbi identitetin e saj. Kryeministri Mark Carney tha se ishte "i shkatërruar" nga "aktet e tmerrshme të dhunës" dhe njoftoi se po pezullonte planet për të udhëtuar në Konferencën e Sigurisë së Mynihut të mërkurën, ku ai ishte planifikuar të zhvillonte bisedime me aleatët mbi gatishmërinë e mbrojtjes transatlantike. Policia tha se u lëshua një alarm për një agresor aktiv pas të shtënave në Shkollën e Mesme Tumbler Ridge të martën pasdite. Ndërsa policia kontrolloi shkollën, gjeti gjashtë persona të vrarë me armë zjarri. Një person i shtatë me një plagë me armë zjarri vdiq gjatë rrugës për në spital. Policia gjeti edhe dy trupa të tjerë në një banesë në Tumbler Ridge. Banesa "besohet të jetë e lidhur me incidentin", tha policia. Në shkollë, "një person që besohet të jetë autorja e sulmit u gjet gjithashtu e vdekur me atë që duket të ishte një plagë e vetëshkaktuar", tha policia. Policia nuk ka publikuar ende asnjë informacion në lidhje me moshën e autores së sulmit apo viktimat.