Përkeqësimi i motit me reshje të dendura shiu ka rritur qarkullimin e automjeteve në rrugët e vendit, teksa policia e rrugore ka rritur angazhimin në akset e identifikuara më problematike. Efektivë të policisë rrugore janë stacionuar në Tiranë dhe qytetet e tjera të vendit në kryeqëzime, autostrada dhe rrugë dytësore, për të shmangur trafikun, por edhe aksidentet. Përveç angazhimit në terren, policia rrugore u bën thirrje drejtuesve të mjeteve përmes një mesazhi ndërgjegjësues që të jenë të kujdesshëm në timon, të sigurohen që në mot me shi fenerët dhe pasqyrat i kanë me dukshmëri maksimale, t’u japin përparësi këmbësorëve në vijat e bardha, të respektojnë sinjalistikën rrugore, mos përdorin telefonin në timon dhe të kontrollojnë gjendjen e gomave dhe sistemin e frenimit, sidomos në kushte të lagështa.