Të dhënat e Bankës së Shqipërisë tregojnë se kredia për pasuri të patundshme, kryesisht apartamente u rrit me ritme të forta edhe përgjatë vitit të kaluar. Sipas të dhënave, huamarrja për strehim, apo investime në prona u rrit me gati 16 për qind, duke shkuar në 4.75 miliardë euro në total. 53 pë qind e kredisë për pasuri të patundshme u takon individëve, ndërsa 47 për qind është marrë nga bizneset. Kreditimi ka qenë faktor shumë i rëndësishëm në mbështetjen e kërkesës në tregun e pasurive të paluajtshme. Por, nga ana tjetër, kjo ka rritur edhe ekspozimin e sektorit bankar kundrejt ecurisë së tregut të pasurive të paluajtshme. Shifrat për vitin 2025 tregojnë se kufizimet e kreditimit të miratuara nga Banka e Shqipërisë në korrik të vitit të kaluar nuk kanë ndikuar në dhënien e huave për banesa për individë. BSH kufizoi deri në 85 për qind të vlerës së pronës masën e kredisë për shtëpinë e parë dhe deri në 70 për qind për shtëpinë e dytë.