Kredia e re për shtëpi u rrit me 25 për qind nga janari në shtator të këtij vitit, krahasuar me të njëjtën periudhë të një viti më parë. Të dhënat zyrtare të Bankës së Shqipërisë tregojnë se rritja vijoi edhe në periudhën korrik-gusht-shtator, që përkon me kohën kur hynë në fuqi masat shtrenguese të saj për kufizimin e kredisë për shtëpi. Statistikat e Bankës tregojnë se në tremujorin e tretë, sektori bankar dha gjithsej gati 140 milionë euro, një rritje me 15 për qind në krahasim me të njëjtën periudhë të vitit të kaluar. Në vlera, të dhënat e Bankës tregojnë se në nëntë muajt e parë të këtij viti bankat e nivelit të dytë kanë shpërndarë gati gjysmë miliardi euro për kredi shtëpie, ose 100 milionë euro më shumë se sa shifra e dhënë përgjatë së njëtës periudhë të vitit të kaluar. Në korrik hyri në fuqi rregullorja e re e Bankës së Shqipërisë, që cakton raportin tavan të kredisë në 85 për qind të vlerës së pronës për shtëpinë e parë dhe 80 për qind të vlerës për shtëpinë e dytë. Ky kufi është për kreditë në lekë, ndërsa për kreditë në euro, ose dollarë tavani është përkatësisht 75 dhe 70 për qind.