Prej pak javësh, një numër i lartë turistësh kanë hyrë në vendin tonë, duke krijuar kështu një fluks të madh në portin e Durrësit, por edhe në aeroportin Nënë Tereza në Rinas. Udhëtarë të shumtë, nga vendet e Bashkimit Europian kanë zbarkuar në vendin tonë për të kaluar pushimet e verës, ku kryesisht pjesa më e madhe e tyre pozicionohen në qytetet bregdetare. Lidhur me fluksin e lartë të turistëve në aeroport, Drejtori i Departamentit për Kufirin dhe Migracionin Eduart Merkaj, në një deklaratë për mediat foli pikërisht për situatën e javëve të fundit në Rinas. Merkaj u ndal edhe tek parandalimi si dhe goditja e krimeve ndërkombëtare, ku sipas tij ka një numër të lartë udhëtarësh të cilët janë të pajisur me dokumenta të falsifikuara që tentojnë të futen në kufirin shqiptar ose anasjelltas, të largohen nga Shqipëria drejt një vendi tjetër.