Klandestinët nga Lindja e Mesme që synojnë vende të BE-së nëpërmjet Shqipërisë, nuk ka të ndalur. Me gjithë masat e marra nga policia shqiptare, e ndihmuar edhe nga kolegët e Bashkimit Evropian dhe të Frontex për kontrollin e kufirit, sërish shumë klandestinë arrijnë të kalojnë “Kufirin e gjelbër” mes Greqisë dhe Shqipërisë, duke ecur për ditë të tëra në këmbë, nëpër shtigje të improvizuara, me shpresën se do t’i shpëtojnë syrit të policisë. Në të gjithë kufirin e gjelbër me Greqinë operojnë 50 oficerë të huaj, ku 21 prej tyre janë dislokuar në pikën kufitare të Kakavijës. Gjatë paradites dy oficerë gjermanë patrullojnë në perimetrin, ndërsa një tjetër kujdeset për kontrollin e dokumentave. Puna më e vështirë është gjatë natës. Fshati Kakavijë që kufizon Shqipërinë me Greqinë ka qenë shpesh rrugë kalimi për emigrantët e paligjshëm që hyjnë në vendin tonë me synim vendet e Europës Qendrore. Muajt e fundit ka patur një rritje të fluksit të emigrantëve afganë apo sirianë që përdorin shqipërinë si rrugë kalimi për në vendet e BE-së. Kufiri i gjelbër është një sipërfaqe me qindra hektarë tokë dhe për ta mbajtur nën kontroll duhen pajisje të sofistikuara. Përveç ndalimit të klandestinëve, puna e Frontex është përqëndruar edhe në luftën ndaj trafikut të armëve dhe lëndëve narkotike. Bazuar në marrëveshjen e nënshkruar pak ditë më parë, nëse do të jetë nevoja në Shqipëri do të mbërrijnë të tjerë oficerë. Kufiri i gjelbër mes Shqipërisë dhe Greqisë është kthyer në shteg të migrimit të paligjshëm. Synimi për mijëra emigrantë, kryesisht nga Algjeria dhe Siria, janë vendet e Evropës Qendrore teksa orvaten të kalojnë tranzit përmes vendit tonë.