Kuba po punon për të rikthyer në funksion rrjetin e saj elektrik pas një ndërprerjeje të dytë mbarëkombëtare në më pak se një javë, me riparimet që pengohen nga mungesa e karburantit si pasojë e embargos së SHBA-së, thanë zyrtarët. Dymbëdhjetë përqind e shtëpive në Havana, një qytet me 1.7 milion banorë, kishin energji elektrike të shtunën në mbrëmje. Riparimi i rrjetit po kryhet gradualisht. Kjo është ndërprerja e katërt e madhe që godet ishullin komunist në gjashtë muaj dhe e nënta që nga fundi i vitit 2024. "Shkëputja totale" e sistemit të premten për shkak të një defekti i la 9.6 milion banorët e ishullit pa shërbim, vetëm dy ditë pasi zyrtarët kishin mundur të rivendosnin në funksion sistemin elektrik pas një ndërprerjeje tjetër masive të regjistruar të hënën. Mes vapës së verës, kubanët shprehin zhgënjimin e tyre për situatën e energjisë elektrike.