Parisi dhe Mynihu janë qytetet ku të blesh një shtëpi duhet të paguash më shumë para. Sipas grupit Deloitte, që e bën këtë klasifikim cdo vit, blerësit e një banese të re në Mynih duhet të paguajnë mesatarisht 10.500 euro për metër katrorë. Vetëm Parisi e lë pas Mynihun, me 13.462 euro për metër katrorë. Londra, Osloja dhe Frankfurti janë qytete ku shtëpitë dhe banesat kushtojnë pak më lirë, rreth 8.400 euro për metër katror. Në anën tjetër, qytetet bullgare Varna dhe Burgas në Detin e Zi, kanë shtëpitë e reja më të lira me një cmim mesatar prej rreth 900 eurove për metër katrorë. Ekspertët e Deloitte-s kanë analizuar 68 qytete të mëdha në 23 shtete. Eksperti për pronat e patundshme, Michael Müller, thotë se çmimet e ndërtimit janë rritur ndjeshëm në Evropë. Problemet në zinxhirin e furnizimit dhe mungesa e materialeve ndërtuese, kanë rritur rreziqet në planifikim dhe ekzekutim të projekteve ndërtuese. Mungesa e stafit dhe inflacioni janë duke rritur çmimet edhe më shumë, thotë Muller. Megjithatë, rritja e normave të interesit mund të ulë kërkesën dhe rritjen e mëtejshme të çmimeve. Në shumë qytete evropiane, strehimi i refugjatëve nga Ukraina ka prekur tregun e pronave – sidomos në Poloni, Sllovaki dhe Hungari – ku edhe ka pasur ulje të ofertave për qiradhënie në tremujorin e dytë të vitit 2022.