“Ku është shoqëruesi yt?”, pyet një nga rojet talebane një vajzë të re afgane në rrugët e Kabulit. E reja po udhëtonte e vetme në një nga taksitë e Kabulit, kur u ndalua në një pikë kontrolli. Talebani i armatosur e urdhëron të telefonojë burrin e saj. Vajza e informon që nuk ka një telefon kështu që ai udhëzon një tjetër shofer taksie për të dërguar vajzën në shtëpi tek bashkëshorti i saj dhe për t’i sjellë përsëri, kësaj radhe të dy bashkë. Në Kabul, duket se jeta vazhdon njëlloj si më parë, por kjo nuk është e vërtetë. Tani nën rregullat e talebanëve, shumëcka ka ndryshuar në kryeqytet. Nëpër rrugë tani nuk mund të shohësh më gra dhe ato të paktat, që dalin, janë të shoqëruara nga meshkuj dhe kanë këmbyer shamitë e bardha me të zeza, kanë zgjatur fundet e fustanet deri në fund të këmbëve po ashtu. Në anën tjetër meshkujt kanë lënë mjekrrën tu rritet. Kur talebanët morën kontrollin thanë: Të gjitha femrave do tu jepen të drejtat që u takojnë, sipas islamit. Por shumë prej tyre janë të frikësuara se nuk do të mund të kthehen në jetën e tyre të mëparshme. Ndërkohë pamjet e radhëve të gjata para bankave për të tërhequr para, janë bërë të zakonshme në kabul.