Fatbardh Kadilli ka dorëzuar zyrtarisht kandidaturën për kryetar të PD, në zgjedhjet që do të mbahen më 13 qershor. Gjatë një prononcimi për mediat, Kadilli u shpreh se gara është jashtëzakonisht e pabarabartë, pasi Basha ka gjithçka në dispozicion, por në aspektin moral, Kadilli tha se ndjehet superior ndaj “kreut në detyre të PD”. “Është një moment shumë i rëndësishëm në PD. Ka ngarkesë dhe emocion. Është një pikë kthese. Ndonëse është një garë krejtësisht asimetrike. Kryetari në detyrë, nuk del as nga zyra, dhe ka në dispozicion mjetet që ishin menduar përballë kryeministrit Edi Rama. Sipas Kadillit ka edhe asimetri tjetër, për të cilën tha se ndjehet krenar. Vij në këtë garë për të shërbyer, vij në këtë garë duke u përfaqësuar nga vlerat; si integriteti, mbajtja e fjalës, aftësia për të qenë besnik me PD. Jam njeriu që e mbaj fjalën, kam kontribuar me pastërti. Nuk e kam tradhtuar kurrë PD-në. Do çoj deri në fund përpjekjen për të ringritur PD-në”.