Terroristët e Hamasit fshihen nën spitalin më të madh në Gaza. Kështu bëri të ditur zëdhënësi i Forcave të Mbrojtjes Izraelite, Daniel Hagari, teksa publikoi edhe një material audio-vizual që “dëshmon se Hamasi ka vjedhur dhe po përdor burime humanitare për aktivitetet e tij terroriste. “Hamasi operon nën spitalin më të madh në Gaza. Aty fshihet, pasi prioritetet e tyre janë të qarta. Dhe populli i Gazës nuk është ndër prioritetet e tyre”, thanë Forcat e Mbrojtjes izraelite në një postim në llogarinë e tyre në Twitter. Në një konferencë të posaçme për mediat ndërkombëtare, zëdhënësi i ushtrisë izraelite zbuloi informacione që "dëshmojnë se Hamasi përdor rregullisht infrastrukturën humanitare në Rripin e Gazës për të përfituar nga aktivitetet e tij terroriste, si dhe përdor strehimin e civilëve për mbrojtjen e tij". Siç thekson zëdhënësi i ushtrisë, "infrastruktura energjetike e spitalit që supozohet të përdoret nga pacientët e tij, në fakt përdoret njëkohësisht për infrastrukturën e nëndheshme terroriste të organizatës dhe drejtuesit e organizatës që rrezikojnë popullsinë civile".