Shkalla e stërvitjes Steadfast Defender 2024 të Natos, shënon një kthim të padiskutueshëm të aleancës në skemat e luftës së ftohtë, tha zëvendës ministri i jashtëm rus Aleksander Grushko për agjencinë shtetërore ruse të lajmeve RIA. NATO tha të enjten se do të niste stërvitjet më të mëdha të saj që nga lufta e Ftohtë, ku do të përfshiheshin 90 mijë trupa dhe do të bëheshin përgatitje se si trupat amerikane do të mund të mbronin aleatët Evropianë në kufi me rusinë dhe në skajin lindor të aleancës nëse një konflikt do të shpërthente atje. “Këto stërvitje janë një element tjetër i luftës hibride të nisur nga perëndimi kundër Rusisë”, tha Grushko. “Një stërvitje e kësaj shkalle shënon kthimin final dhe të patjetërsueshëm të NATO-s tek skemat e luftës së ftohtë, kur procesi i planifikimit ushtarak, burimet dhe infrastruktura përgatiten për luftë me rusinë”, tha ai. Nato nuk e përmendi rusinë specifikisht në njoftimin e saj. Por dokumentet strategjike të saj e identifikojnë rusinë si kërcënimin më të madh dhe më direkt ndaj sigurisë së vendeve anëtare të NATO-s. Rusia nisi pushtimin në shkallë të plotë të ukrainës në shkurt 2022 në atë që Kievi dhe aleatët e tij perëndimorë kanë thënë se është një rrëmbim toke i paprovokuar, imperialist. Moska dhe kryediplomati i saj Sergei Lavrov, që atëherë kanë akuzuar perëndimin kolektiv të kryerjes së një lufte hibride kundër rusisë duke mbështetur ukrainën përmes ndihmave financiare dhe ushtarake.