Një vit më parë kancelari gjerman, Olaf Scholz mbajti një fjalim në Bundestag, që ndoshta do të përcaktojë edhe të gjithë mandatin e tij si kancelar, ku përdori fjalën "kthesë epokale". Ai fjalim, një reagim pas fillimit të luftës në Ukrainë kishte si bazë njoftimin, se Bundesëehri gjerman do të merrte një fond të posaçëm prej 100 miliardë eurosh për armatimin. Por tani që viti ka kaluar, ushtria gjermane duket se është në të njëjtin vend ku ishte më parë. Opozita kritikon qeverinë dhe thotë se ushtria nuk ka përfituar shumë nga fondi i posacëm prej 100 miliardë eurosh. "Bundesëehri ka deficite të mëdha dhe kthesa epokale nuk ka filluar ende tek ajo", thotë një zëdhënës i CDU-së. "Trupa ka humbur një vit dhe është më dobët se në gusht 2022" – shton ai. Kryetarja e komisionit parlamentar të Mbrojtjes në Bundestag, Marie-Agnes Strack-Zimmermann kundërpërgjigjet duke thënë se në 16 vitet që qeverisi CDU/CSU nën kancelaren Merkel duke pasur edhe Ministrinë e Mbrojtjes nën vete, "nuk është bërë asgjë" për modernizimin e ushtrisë dhe më pas rendit sukseset e qeverisë së koalicionit në 1 vit: porosi të avionëve luftarakë F-35 dhe helikopterëve të rëndë nga SHBA si edhe një ofensivë digjitalizimi për modernizimin e forcave të armatosura. Ministria e Mbrojtjes bën të ditur, se janë parashikuar 30 miliardë nga 100 miliardë eurot në dispozicion për Bundesëehrin. Nga aleatët europianë, Gjermania është kritikuar se shumë porosi të mëdha i janë dhënë në SHBA. Por në fund të fundit një pjesë e madhe e këtij fondi të posaçëm do të qëndrojë në Gjermani, sepse vetë Gjermania ka një industri të fortë armatimi. Për më tepër, 100 miliardë eurot nuk mund të shpenzohen në 1 vit. Prodhimi i armatimeve me teknologji të lartë kërkon kohë. Avionët e parë luftarakë amerikanë F-35 psh do të jenë gati vetëm në vitin 2026.