Presidenti Ilir Meta ka kthyer për rishqyrtim në Kuvend ndryshimet në Kodin Zgjedhor, pasi i cilëson ato si të njëanshme dhe në kundërshtim të hapur me Kushtetutën e parimet demokratike. “Ndryshimet e njëanshme të Kodit Zgjedhor krijojnë një pozitë të pabarabartë, diskriminuese, duke rëndë ndesh si me Kushtetutën dhe Konventën Europiane të të Drejtave të Njeriut; – Ndryshimet e njëanshme në Kodin Zgjedhor të datës 5 Tetor, për shkak të pozitave diskriminuese që ato përmbajnë krijojnë një terren shumë polarizues në vend. Kjo pozitë rëndohet edhe më shumë para faktit që në mungesë të Gjykatës Kushtetuese, çdo kundërshtim i këtyre dispozitave lidhur me antikushtetutshmërinë e tyre nuk mund të marrë së shpejti një përgjigje përfundimtare; – Ndryshimet e njëanshme cenojnë kushtet e vendosura nga Bashkimi Europian, çka do të përkthehet me një tjetër vendim negativ për Shqipërinë, duke cenuar drejtpërdrejt ecurinë e procesit të integrimit europian të vendit,”– shkruhet ndër të tjera në dekretin e Presidentit Meta. Pak orë më vonë pas daljes së dekretit, nga Korça ku mori pjesë në një ceremoni përkujtimore në nder të mësueses Luiza Duli, e cila humbi jetën në një aksident, teksa shkonte në shkollë, Meta tha se kthimi pas i ligjit në Kuvend është një tjetër mundësi për maxhorancën socialiste. “Sapo është publikuar. Reagimi i menjëhershëm i PPE pasi kuvendi votoi në mënyrë të njëanshme këto ndryshime dhe thirrja e tyre për t’a kthyer këtë akt në Kuvend, dhe rikthimin e aktit në shinat e marrëveshjes së 5-qershorit, ishte një mundësi tjetër për maxhorancën, të respektojë këtë marrëveshje gjithpërfshirëse në të kundërt do të mbajë përgjegjësi për këtë ndryshim të rregullave të lojës dhe ç’është më e rëndësishmja të shkeljes së procesit të negociatave.”