Akrepat e orës do të zhvendosen përpara, natën mes të shtunës dhe të dielës, ditë që këtë vit koincidon edhe me festën e pashkës. Ndryshimi i orës bëhet ekzaktësisht në orën 2 të mëngjeist të së dielës, kur edhe hyn në fuqi ora verore. Mund të shijojmë një orë dritë më shumë, por do të humbasim 60 minuta gjumë, mungesë që do ta ndjejmë në ditët e para. Qëllimi i ndryshimit të orës, është kursimi i energjisë elektrike. Ora diellore do të kthehet në fuqi në fundjavën e fundit të tetorit, kur natën mes të shtunës dhe të dielës, 26 dhe 27 tetor, do të kthehen sërish pas akrepat, duke rekuperuar orën e gjumit që na u hoq në fillim të stinës. Kompjuterat dhe aparaturat e lidhura me internet, apdejtohen automatikisht ndërsa është e nevojshme që të rregullohet manualisht ora në aparatet analoge. Ndryshimi i orës sjell disa telashe, të lidhura mbi të gjitha me ndryshimin e rutinës ditore dhe humbjen e një ore gjumi. Por sipas ekspertëve, kjo kalon shpejt. Ata po ahstu ofrojnë edhe disa këshilla sjelljeje, që do ta bëjnë më të lehtë adaptimin. Ekspertët këshillojnë që të fillojë përgatitja që më herët, ndoshta nga e shtuna, duke shkuar pak më herët se zakonisht në shtrat në mënyrë që të amortizohet efekti i ndryshimit të orës. Po ashtu, duhet të shijojmë sa më shumë dritën natyrale, si mënyra më e mirë për tu sinkronizuar me orën e re.