Vera e 2024 tashmë ka mbaruar dhe ka ardhur koha të kthejmë orën pas. Akrepat do të kthehen një orë pas, pra në orën tre të mëngjesit mes të shtunës 26 tetor dhe të dielës, 27 tetor, ata do të ripozicionohen në orën dy. Kështu, do të rifitojmë orën e gjumit që humbëm në fund të marsit të kaluar, por pasditet tona do të kenë 60 minuta më pak dritë. Ora diellore do të qëndrojë në fuqi deri të dielën e 31 marsit 2025, kur po në tre të mëngjesit do të hyjë në fuqi ora verore. Pavarësisht polemikave që shoqërojnë prej disa vitesh ndryshimin e orës, për momentin nuk ka risi për ata që shpresojnë prej kohësh që ky ndryshim të abrogohet. Disa vende evropiane duan që ora të mos ndryshohet gjatë gjithë vitit, por duhet që të gjithë vendet e BE-së të bien në një mendje në mënyrë që të ketë një sistem unik, të vlefshëm për të gjithë. Por për momentin, nuk ka ende një zgjidhje në horizont. Ndryshimi i orës, shoqërohet shpesh me probleme, si psh vështirësi për të fjetur në mbrëmje, zgjime gjatë natës, përgjumje gjatë ditës, lodhje, vështirësi për tu mësuar me ritmet e reja, acarim, stres dhe ndryshim humori. Përvec kësaj, ideja që dita do të jetë më e shkurtër është një problem më vete. Edhe pse kemi një orë dritë më shumë kur zgjohemi në mëngjes, shkurtimi i menjëhershëm i pasditeve, ndikon tek humori dhe mirëqënia e të gjithëve.