Meqë pushtimit rus të Ukrainës nuk i shihet ende fundi në horizont, presioni mbi Gjermaninë po rritet për të riorganizuar industrinë e saj të mbrojtjes. Terma të tilla si "gatishmëri për luftë" janë përdorur vazhdimisht, së bashku me thirrjet që ushtria gjermane të bëhet ushtria konvencionale më e fortë në Evropë, diçka që deri pak vite më parë ishte pothuajse e paimagjinueshme. Kërkesat maksimaliste të Rusisë në luftën e saj kundër Ukrainës, të kombinuara me tërheqjen graduale të mbështetjes së SHBA-së nga NATO, shërbejnë si një thirrje e vazhdueshme zgjimi për evropianët, të cilët po detyrohen gjithnjë e më shumë të marrin përgjegjësinë për sigurinë e tyre. Për t'u bërë të aftë për mbrojtje, dhe të aftë për luftë, sa më shpejt të jetë e mundur, qeveria gjermane planifikon të rrisë buxhetin e mbrojtjes në pothuajse 153 miliardë euro deri në 2029. Ky vit përmendet shpesh si pikë referimi. Deri atëherë, shpenzimet për mbrojtjen pritet të arrijnë rreth 3.5 përqind të produktit të brendshëm bruto dhe Bundesëehr pritet të jetë "gati për luftë", pasi një sulm i mundshëm rus në territorin e NATO-s mund të ndodhë rreth asaj kohe.