Policia në Bruksel, ka qëlluar për vdekje autorin e vrasjes së dy shtetasve suedezë, mbrëmjen e të hënës. Abdesalem Lassoued, 45 vjec, u qëllua për vdekje në një kafene në lagjen Schaerbeek. Dy shtetas suedezë mbetën të vrarë dhe një tjetër u plagos nga të shtënat me armë zjarri në Bruksel, ndërsa do të zhvillohej një ndeshje futbolli mes Belgjikës dhe Suedisë, tha mbrëmjen e të hënës policia. Belgjika rriti nivelin e gatishmërisë kundër terrorizmit në nivelin e saj më të lartë. Autori, ishte me origjinë tuniziane dhe po qëndronte në belgjikë në mënyrë të paligjshme pasi kërkesa për azil i ishte refuzuar. Në një video të postuar në mediat sociale ai tha se e kishte kryer sulmin në emër të zotit dhe se i përkiste shtetit islamik. Kryeministri belg Alexander de Croo konfirmoi në platformën e mediave sociale X, se viktimat ishin suedezë, por nuk konfirmoi emrat e tyre. “Sapo i ofrova ngushëllimet më të sinqerta kryeministrit suedez për sulmin e tmerrshëm të mbrëmjes së sotme ndaj shtetasve suedezë në Bruksel”, tha Kryeministri belg de Croo. “Mendimet tona janë me familjet dhe miqtë që humbën të dashurit e tyre. Si partnerë të ngushtë, lufta ndaj terrorizmit është një luftë e përbashkët”, tha ai. Një gazetë belge tha se kishte gjasa që viktimat të ishin tifozë sporti. Belgjika po luante në fushën e saj përballë Suedisë për fazën kualifikuese të kampionatit Euro 2024. Ndeshja u ndërpre gjatë pushimit pas gjysmës së parë, për shkak të arsyeve të sigurisë. UEFA njoftoi se do japë informacione në vazhdim.