Procesin e dialogut për normalizimin e raporteve te Kosoves me Serbinë, do ta drejtojë në vijim Ministria e Punëve të Jashtme dhe Diasporës e Kosovës, e pohuar kjo nga kreu i saj Glauk Konjufca, gjatë takimit të tij me përfaqësuesin e posaçëm të BE-së për dialogun, Peter Sorensen. Biseda mes tyre është përqëndruar drejt gjendja aktuale e procesit dhe idetë për një qasje më efektive dhe të qëndrueshme. Konjufca, i cili është edhe zëvendëskryeministër i parë, theksoi se Kosova e sheh dialogun si mundësi për përmirësimin e marrëdhënieve fqinjësore me Serbinë, si dy shtete sovrane, dhe përparimin drejt integrimit europian. Mbetet e paqartë megjithatë, nga sa pohon dhe REL, nëse Konjufca do të jetë i ngarkuar plotësisht me këtë process të nisur që nga viti 2011. Ministria e jashtme ende nuk e ka konfirmuar këtë informacion. Në të kaluarën, dialogu është udhëhequr në nivel politik nga vetë kryeministri Albin Kurti, ndërsa në nivel kryenegociatorësh nga Besnik Bislimi. Vitet e fundit, ka pasur një sërë raundesh të dialogut në nivel kryenegociatorësh, por takime të nivelit të lartë politik nuk ishin mbajtur më që nga shtatori i 2023. Gjatë këtij procesi 15-vjeçar, Kosova dhe Serbia kanë arritur disa marrëveshje, por jo të gjitha janë zbatuar. Në vitin 2023, palët arritën Marrëveshjen e Ohrit për normalizim, e cila ende nuk është zbatuar plotësisht, edhe pse sipas Bashkimit Europian, ajo është e detyrueshme për të dyja palët.