Autoritetet në Kosovë njoftuan të hënën se shtatë nga 11 të kthyerit nga Siria në Kosovë të shtunën, po mbahen në ndalim policor prej 48 orësh ndërsa pritet të paraqiten para gjykatës “sipas afateve ligjore”. Ministri i Brendshëm i Kosovës, Xhelal Sveçla, njëherësh bashkërendues kombëtar për luftimin e terrorizmit dhe ekstremizmit të dhunshëm, tha në një konferencë për media se rehabilitimi dhe riintegrimi i të kthyerve nga Siria është sfidë e madhe për institucionet e vendit. “Tani fillon puna e madhe me riintegrimin e shtetasve tanë të kthyer në Kosovë, do të na duhet angazhim shumë dimensional, jo vetëm i institucioneve të sigurisë por edhe i atyre të mjekësisë, arsimit e të gjitha instrumenteve shtetërore në mënyrë që këta persona sa më mirë të integrohen në shoqëri, normalisht ata të cilët kanë kryer krime edhe të sillen para drejtësisë”, tha Sveçla. Në mesin e 11 të kthyerve nga zonat e konfliktit në Siri, janë gjashtë burra, një grua dhe katër fëmijë, ndërsa kthimi i tyre sipas autoriteteve në Kosovë u bë me ndihmën e Shteteve të Bashkuara të Amerikës dhe partnerëve ndërkombëtarë. Ambasada amerikane në Prishtinë, tha të shtunën se kthimi i këtyre shtetasve “dëshmon vullnetin e Kosovës që të marrë përgjegjësi për shtetasit e saj, ndërsa vendos shembull edhe për të tjerët”. Drejtori i Policisë së Kosovës, Samedin Mehmeti, tha ndërkohë se për momentin nuk ka një numër të saktë të shtetasve të Kosovës që ndodhen ende në zona të konfliktit. Deri më tani janë kthyer që andej gjithsej 253 persona, mes të cilëve 39 gra dhe 84 fëmijë. Që nga fillimi i konfliktit në siri, rreth 400 shtetas kosovarë besohet se kanë shkuar atje. Mbi 70 kanë humbur jetën ndërsa shumë të tjerë janë kthyer ndër vite, kryesisht të zhgënjyer me cka janë përballur.