Duhen edhe 90 ditë nga dita e votimeve të 25 prillit dhe interesi i të gjithëve janë emrat e kandidatëve jo vetëm nga Partia Socialiste, por edhe opozita, e cila në koalicionin e saj ka edhe partitë të tjera si LSI, apo PDIU. Deri më tani janë lakuar emrat e koordinatorëve politikë nga të tre këto forca politike, por padyshim që Tirana mbetet qarku problematic, sepse ka edhe numrin më të madh të deputetëve. Pas shumë enigmash, kryetari i Partisë Demokratike do të jetë në listën e qarkut të Tiranës. Këtë e ka zbuluar fillimisht numri dy i PD-së, Gazment Bardhi gjatë një interviste për median, por u konfirmua edhe nga vetë kryedemokrati. Edhe në zgjedhjet e katër viteve më parë Basha ishte në krye të listës së Tiranës. Ndërsa enigma mbetet ende se ku do të konkurrojë kryesocialiste Edi Rama. Vlora dhe Durrësi janë përmendur si qarqe të mundshme. Në zgjedhjet e shkuara, Rama ishte deputeti i Vlorës, ndërsa ishte renditur i jo i pari, por i gjashti në listën e kandidatëve për deputet, duke treguar se ky ishte dhe synimi i mandateve për këtë qark. Edhe pse rezultati ishte tejet suprizues duke rrëmbyer tetë mandate nga 12 që ka gjithsej ky qark. Kandidimi i Ramës në Durrës mund të lidhet dhe me faktin se si qarku i prekur nga tërmeti i 26 Nëntorit, dhe se aty qeveria ka përqendruar pothuajse të gjitha investimet për rimëkëmbjen e qytetit bregdetar. Nga ana tjetër, vendosja e Ramës në një qark ku beteja është tejet e fortë mes demokratëve dhe socialistëve mund të shihet dhe si tregues më shumë për maksimizin e votave të PS-së, duke pasur në konsideratë se edhe në qytetin bregdetar duhet një emër me peshë për të bindur elektoratin durrsak. Kryetarja e LSI-së, Monika Kryemadhi e ka vendosur që të kandidojë në dy qarqe, nisur nga fakti se Kodi Zgjedhor ia mundëson një gjë të tillë. Vetë ajo ka bërë të ditur se do të kandidojë në Fier dhe në Elbasan. Qarku Fier ishte preferenca e Kryemadhit edhe në zgjedhjet e shkuara, ndërsa më parë ka kryesuar listën në qarkun e Lezhës.