Drejtësia italiane po heton mbi kryeministren Giorgia Meloni për shkak të lirimit të një të akuzuari si kriminel lufte nga Libia, që është në kërkim nga Gjykata Penale Ndërkombëtare. Prokurorët po hetojnë edhe ministrin e Drejtësisë, ministrin e Brendshëm dhe sekretarin e Shtetit për Shërbimet Sekrete. Meloni deklaroi ndërkohë se nuk është e detyruar të japë dorëheqjen. Fakti që ndaj saj po hetohet, nuk do të thotë se ajo është fajtore, dhe as se detyrimisht do të pasojë një padi zyrtare. "Unë nuk lejoj të më bëjnë presion, nuk lejoj të më trembin, për këtë arsye unë jam e padëshiruar për ata, që duan që Italia të ndryshojë dhe të bëhet më e mirë", shkruan Meloni në Facebook. Italia ka lënë të lirë një të dyshuar për krime lufte dhe Gjykata Penale Ndërkombëtare do të dijë, përse ka ndodhur kjo. Gjykata Penale Ndërkombëtare e akuzon libianin për tortura dhe përdhunime. Fjala është për Osama Almasri Najeem, shef i policisë kriminale të Libisë dhe një ndër drejtuesit e burgut famëkeq të milicive SDF, të mbështetur nga qeveria në kryeqytetin Tripoli. Trupa e milicëve, që vepron si një lloj policie ushtarake, akuzohet se gjatë luftës civile në Libi ka kryer një sërë mizorish. Urdhërarresti i Gjykatës Penale Ndërkombëtare kundër Najeemit bazohet në krime të kohëve të fundit dhe krime në burgjet e SDF-së. Gjykata Penale Ndërkombëtare e akuzon atë për krime çnjerëzore si vrasje, tortura dhe përdhunime të të burgosurve. Ky rast është mjaft delikat për qeverinë italiane. Më 19 janar, sipas një të dhëne nga Gjykata Penale Ndërkombëtare, Najeem është arrestuar në Torino, por dy ditë më pas sërish është liruar dhe mënjehrë ka udhëtuar për në Tripoli, ku është pritur me brohoritje nga mbështetësit e tij. Sipas disa njoftimeve në media për flurutimin e Najeem është përdorur një avion i shtetit italian. Si shtet që ka nënshkruar kontratën me Gjykatën Penale Ndërkombëtare Italia duhet t'i dorëzojë personat e dyshuar dhe në kërkim nga kjo gjykatë.