Sundimi 15-vjeçar i kryeministres së Bangladeshit Sheikh Hasina përfundoi të hënën pasi ajo u arratis nga vendi, pas javësh të tëra protesta vdekjeprurëse ndërkohë që ushtria njoftoi se do të formonte një qeveri të përkohshme. Hasina kishte kërkuar që nga fillimi i korrikut të shtypte protestat kundër qeverisë së saj, por ajo u largua pas trazirave të së dielës, në të cilat u vranë afro 100 persona. Shefi i ushtrisë së Bangladeshit, tha në një transmetim drejtuar kombit në televizionin shtetëror të hënën, se Hasina kishte dhënë dorëheqjen dhe ushtria do të formonte një qeveri të përkohshme. "Vendi ka vuajtur shumë, ekonomia është goditur, shumë njerëz janë vrarë, është koha për të ndaluar dhunën," tha ai duke shtuar se do të bisedonte me presidentin për krijimin e një qeverie të përkohshme në vendin e Azisë Jugore me rreth 170 milionë banorë.