Keir Starmer u zotua se do të rindërtojë Britaninë si kryeministër i saj i ardhshëm pasi Partia e tij Laburiste arriti të premten një fitore dërrmuese në zgjedhjet parlamentare, duke i dhënë fund 14 viteve të qeverisë konservatore shpesh të trazuar. Laburistët e qendrës së majtë fituan një shumicë të konsiderueshme në parlamentin me 650 vende. Konservatorët e Rishi Sunak ndërkohë pësuan disfatën më të rëndë në historinë e gjatë të partisë, pasi votuesit i ndëshkuan për krizën e rënduar ekonomike, koston e rritur të jetesës, dështimin e shërbimeve publike dhe një sërë skandalesh. "Ne ia dolëm," tha Starmer në fjalimin e triumfit. "Ndryshimi fillon tani... Ne thamë se do t'i japim fund kaosit dhe do ta bëjmë këtë; thamë se do ta ndryshojmë kapitull dhe e bëmë. Sot, ne hapim kapitullin tjetër, fillojmë punën për ndryshim, nisim misionin e rinovimit kombëtar dhe rindërtimit të vendit tonë”.