Kryetarja e LSI-së, Monika Kryemadhi e cilësoi lajm shumë të keq që në dokumentin e qeverisë holandeze, konsiderohen jo bindëse rezultatet që KE raporton për Shqipërinë dhe sqarohet se mbajtja e konferencës së parë ndërqeveritare me vendin tonë, do të bëhet pasi Shqipëria të plotësojë të gjitha kushtet. “Edhe Holanda e ndau Shqipërinë nga Maqedonia e Veriut, është lajm i keq për Shqipërinë, ndoshta për qeverinë Rama s’është lajm i keq se ndihet komod, rruga e Shqipërisë për Ramën s’është Evropa por janë drejtimet e paditura. Për ne e Shqipërinë është lajm i keq se domethënë që procesi i integrimit evropian po largohet çdo ditë e më shumë nga sytë e shqiptarëve”, tha Kryemadhi. Në lidhje me Kodin e ri Zgjedhor, i cili u miratua në mënyrë të njëanshme nga mazhoranca, Kryemadhi tha se ky kod nuk do të ndikojë tek opozita. “Ajo që dua të theksoj është se çështja e komisionit të Venecias nuk ka të bëjë me votën në kuti, por me kalkulim votash apo si do sillet në fund të ditës secili nga ne. Kështu që strategjia e opozitës, pavarësisht kodit zgjedhor që ka miratuar parlamenti ilegjitim, nuk ka të bëjë dhe nuk ndikon në punën e opozitës për të organizuar që në 25 prill të shkojnë në kutitë e votimit dhe të ndëshkojnë rilindjen dhe të vlerësojnë alternativën e opozitës së bashkuar”.