Kryeministri Edi Rama thotë përmes zyrës së shtypit të Kryeministrisë se mbajtja në qeli e kryetarit të Bashkisë së Tiranës, Erion Veliaj nuk cenon vetëm ushtrimin e mandatit si kryebashkiak, por të drejtën e zgjedhësve që e kanë votuar. Kryeministria iu përgjigj interesimit të Top Channel në lidhje me vendimin e Kryebashkiakut për të hequr delegimin e kompetencave të nënkryetarja, Anuela Ristani. ‘Për këtë çështje ka folur Gjykata Kushtetuese dhe vendimi i saj është i qartë: Erion Veliaj është kryetar i Bashkisë së Tiranës dhe ushtrimi i mandatit nga ana e vet, nuk është një e drejtë thjesht e tij si i zgjedhur, po është një e drejtë e zgjedhësve të kryeqytetit, e cila cënohet përditë me pasoja jo të papërfillshme në mbarëvajtjen e punëve dhe shërbimeve të Bashkisë Tiranë’, thotë Kryeministria. Ky, vijon reagimi, është opinioni i kryeministrit dhe kjo është një çështje e respektimit të Kushtetutës e të vullnetit të zgjedhësve, tek e cila kryeministri nuk sheh hapësirë për interpretime nga askush. ‘Sa për “situatën e krijuar” në Bashkinë e Tiranës, ajo është pjesë e konfuzionit që ka krijuar në ecurinë e kryeqytetit të Shqipërisë kyçja e të zgjedhurit në qeli, e cila ka imponuar një qeverisje të Tiranës me vartës në distancë - një absurd “ligjor” që në Europën demokratike as nuk mund të imagjinohet, e jo më të ndodhë’, mbyllet deklarata e zyrës së shtypit të Kryeministrisë dhënë për Top Channel.