Pyje e toka u shkrumbuan në Krujë, ku pushtetin përgjatë orëve e mbrëmjes së 8 gushtit e morrën flakët masive të zjarrit, të cilat kërcënuan oborret e shtëpive të banorëve të zonës, magazinat dhe një pike të shpërndarjes së gazit. Beteja më e vështirë me flakët e zjarrit ishte në zonën e Barabit–Lluban, ku përhapja u favorizua nga kushtet klimaterike, por edhe terreni i vështirë. Mes frikës dhe panikut të humbjes së investimit të një jete, banorët e zonës u evakuuan me urdhër të bashkisë së Krujës. Për realizimin e evakuimit u angazhuan mjetet dhe strukturat e Bashkisë Krujë, Policia e Shtetit dhe Forcat e Armatosura. Në operacionin për izolimin dhe vënien nën kontroll të zjarrit në Malin e Krujës morën pjesë mbi 200 efektivë të strukturave të emergjencave civile dhe Forcave të Armatosura, si dhe 80 efektivë të Mbrojtjes nga Zjarri dhe Shpëtimit. Në terren dhe nga ajri u angazhuan 21 mjete zjarrfikëse; 3 helikopterë; droni Bayraktar; 2 dronë me kamera termike dhe autoambulanca. Një vatër zjarri u shfaq edhe në terrenin e vështirë malor, në kufirin mes fshatrave Golem dhe Progonat. Ndërhyrja e menjëhershme e zjarrfikësve bëri të mundur izolimin e flakëve dhe më pas shuarjen e plotë të zjarrit, duke parandaluar përhapjen e tij. Nga flakët u përshkua një sipërfaqe prej rreth 3 hektarësh me bimësi të ulët, shkurre dhe barishte. Ndërkohë po vijon puna për izolimin e zjarrit në Panahor dhe Vlosh, në Mallakastër. Gjatë orëve të mëngjesit, zjarri ishte me intensitet disi më të ulët, ndërsa forcat zjarrfikëse dhe strukturat e angazhuara vijuan ndërhyrjen për të parandaluar përhapjen e flakëve.