Mazhoranca dhe opozita janë bashkuar në Këshillin Bashkiak të Krujës për të kundërshtuar propozimin e reformës territoriale që i heq kësaj bashkie fshatin dhe aeroportin e Rinasit. Të 31 këshilltarët bashkiakë votuan kundër propozimit të Komisionit të Posaçëm Parlamentar, që parashikon ndryshimin e përkatësisë administrative të Rinasit, duke e kaluar zonën nga Njësia Administrative Nikël, pjesë e Bashkisë Krujë te Bashkia e Tiranës. Këshilli Bashkiak argumenton se bëhet fjalë jo thjesht për një riorganizim administrativ, por për një ndryshim të territorit dhe kufijve që prekin edhe dy qarqet, atë të Tiranës dhe të Durrësit. Për këtë arsye, sipas këshilltarëve, procesi duhet të shoqërohet me transparencë dhe konsultim real me komunitetin e prekur, në përputhje me Kushtetutën, Kartën Europiane të Autonomisë Vendore dhe legjislacionin në fuqi.