Një operacion urgjent është zhvilluar gjatë natës në ujërat pranë Durrësit, pasi një kroçierë turistike kërkoi ndihmë për një pasagjer anglez me probleme të rënda shëndetësore. Sipas autoriteteve portuale, kroçiera lëshoi sinjalin SOS rreth orës 23:50, ndërsa ndodhej afro 20 milje larg Durrësit. Kapiteni i anijes raportoi se në bord ndodhej një shtetas britanik me simptoma të rënda, që kërkonin ndërhyrje të menjëhershme spitalore. Pas njoftimit, Kapiteneria e Portit të Durrësit udhëzoi kroçierën, e cila po lundronte nga Korfuzi drejt Kotorrit, të afrohej në radën e portit shqiptar. Menjëherë u vu në lëvizje operacioni i shpëtimit, ku u vunë në dispozicion ekuipazhi përkatës, oficerët e Kapitenerisë dhe ambulanca për transportin e të sëmurit drejt spitalit. Në orët e para të mëngjesit, shtetasi anglez mbërriti në Spitalin Rajonal të Durrësit, ku ndodhet nën kujdesin e mjekëve dhe fatmirësisht jashtë rrezikut për jetën.