Rreth 650 turistë amerikanë e kanadezë kanë mbërritur në Durrës. 80 të tjerë, kryesisht anglezë, do të nisin lundrimin nga porti i Durrësit me të njëjtën kroçierë, “Seven Seas Splendor”. Anija turistike luksoze “Seven Seas Splendor” mbërriti për herë të parë në Portin e Durrësit me rreth 650 pasagjerë në bord, ndërsa 80 turistë nga vende të ndryshme u imbarkuan në Durrës për të nisur udhëtimin e tyre më pas drejt Zadar, Kroaci. Kompania së cilës i përket kjo anije e ka përfshirë prej vitesh Portin e Durrësit në itineraret e saj turistike, ndërsa këtë sezon shënohet një zhvillim i ri me nisjen e pasagjerëve direkt nga Durrësi, si pikënisje, duke konfirmuar rritjen e rolit të vendit në industrinë e kroçerave. Përfaqësuesit e kompanisë gjatë një ceremonie me autoritetet portuale kanë vlerësuar kushtet dhe lehtësitë e ofruara nga Porti i Durrësit për pritjen dhe përpunimin e turistëve.